वैक्सीन लगवाना हे
भैया समारू अफवाह मे नइ जाना हे।
हम सब ल जाके वैक्सीन लगवाना हे।
वैक्सीन लगवाके इहा कोनो नइ मरत हे।
ऊपरे ऊपरे उड़त अफवाह म सब डरत हे।
वैक्सीन लगाके कोरोना ले निजात पाना हे..
हम सब ल जाके वैक्सीन लगवाना हे।
कोनो कहिथे वैक्सीन ले बांझ होवत हे नारी।
जादा दिन नइ होहे फेर पता कैसे चलगे संगवारी।
इही बात ल नारी मन ल समझाना हे..
हम सब ल जाके वैक्सीन लगवाना हे।
नपुंसक होये के बात घलो फइलावत हे।
डाँक्टर मन थकगे वो नपुंसक ल नइ पावत हे।
कौआ ले गे कान ल खोजे बर नइ जाना हे..
हम सब ल जाके वैक्सीन लगवाना हे।
वैक्सीन ले होवत हे कइथे बड़े बड़े बीमारी।
कतको लगवा डरिस आवत नइहे कखरो पारी।
कहवइया ल काहन दे हमला नइ घबराना हे..
हम सब ल जाके वैक्सीन लगवाना हे।
फेर अही कहिथे कोरोना के तीसरा लहर।
एखर ले जादा देखाही अपन बड़े कहर।
आये के पहली ए उपाय ल अपनाना हे..
हम सब ल जाके वैक्सीन लगवाना हे।
अशिक्षित मन ल हम सब मिल समझाबो।
शिक्षित हन त थोरिक कर्तव्य ल निभाबो।
पोलियो ल भगायेन अब कोरोना ल भगाना हे..
भैया समारू अफवाह मे नइ जाना हे।
हम सब ल जाके वैक्सीन लगवाना हे।
🖋️पवन नेताम 'श्रीबासु'
सिल्हाटी, कबीरधाम (छ.ग.)
टिप्पणियाँ
एक टिप्पणी भेजें